Neidiwch ar drên i gael paned wrth i GWR ddathlu Wythnos Cymru yn Llundain

Ar Ddydd Gŵyl Dewi, dydd Gwener 1 Mawrth, bydd GWR yn hudo pobl sy’n teithio ar wasanaethau o Abertawe a Chaerdydd drwy roi iddynt baned o de brand arbenigol Welsh Brew am ddim.

Yn ogystal â’r te, bydd gwasanaethau ar y trên rhwng 0623 a 0837 yn cynnig pice ar y maen/cacennau cri a theisen frau Gymreig i deithwyr er mwyn dathlu’r ŵyl. 

Bydd staff sy’n siarad Cymraeg wrth law hefyd, yn gwneud cyhoeddiadau Cymraeg wrth i’r gwasanaethau deithio trwy Gymru ar eu ffordd i Lundain Paddington.  

Dywedodd Mererid Gehler, Rheolwr Gwasanaethau ar y Trên GWR bu’n helpu i drefnu’r rhoddion: 

“Allwn ni ddim aros i’ch croesawu chi ar y trên a helpu i ddathlu pob peth Cymreig ar ein diwrnod cenedlaethol. Rydym yn falch o etifeddiaeth GWR yng Nghymru a’n timau yn Abertawe a Chaerdydd ac wrth ein boddau’n cael y cyfle i ddathlu Cymru yng Nghymru ac ar draws rhwydwaith GWR.  

“Lle mae ein staff yn siarad Cymraeg, hyd yn oed tipyn bach, rydym yn falch i’w cefnogi i ddefnyddio’r Gymraeg yn eu gwaith – ac ar Ddydd Gŵyl Dewi yn arbennig. Bydd ein cwsmeriaid yn gallu adnabod gweithiwr GWR sy’n siarad Cymraeg trwy’r Ddraig Goch ar ei fathodyn enw.   

“Os ydych chi’n colli’ch cyfle i gael paned yn y bore, beth am deithio nôl ar ein gwasanaeth Pullman Dining am 1748? Rydym yn gobeithio cadw rhywfaint o’r te yn ôl ar gyfer y daith honno.”

Caiff y teithwyr eu trochi mewn profiad Cymreig wrth gyrraedd Llundain, gydag arddangosfa ffotograffiaeth arbennig mewn partneriaeth â Thrafnidiaeth Cymru, Croeso Cymru a Network Rail ar blatfformau 8 a 9. Os na welwch yr arddangosfa yn Llundain, mae’n mynd ymlaen at orsafoedd Caerdydd ac Abertawe yn ystod y misoedd nesaf. 

Dywedodd Rich Middleton, Rheolwr Twf Cymru a Gorllewin Lloegr: 

“Gwyddom fod gorsaf Paddington yn ddechrau antur Great Western Railway i lawer o’n teithwyr, felly pa le gwell i ddangos yr hyn sydd gan Gymru i’w gynnig na’n harddangosfa gyda chorff Croeso Cymru? Ar Blatfformau 8 a 9, bydd ein cwsmeriaid yn gallu gweld rhai o gyrchfannau gwych Cymru, a wasanaethir gan GWR a’n cyfeillion yn Nhrafnidiaeth Cymru.” Caiff Wythnos Cymru yn Llundain ei chynnal bob blwyddyn ac mae’n gyfle i ddathlu a hyrwyddo Cymru ym mhrifddinas y DU. Mae’r arddangosfa yn caniatáu i fusnesau a sefydliadau o Gymru gysylltu ac adeiladu partneriaethau â chynulleidfaoedd a leolir yn Llundain mewn digwyddiadau yn ystod misoedd Chwefror a Mawrth. Caiff y dathliad ei gynnal o ddydd Iau 22 Chwefror i ddydd Mercher 6 Mawrth eleni.

Mae GWR yn rhedeg 30 o drenau bob dydd i’r ddwy ffordd rhwng Caerdydd (mwy na 20 ohonynt o Abertawe) a Llundain Paddington. Ym mis Mai 2023, cyflwynodd GWR 65 o drenau ychwanegol yn ne Cymru, gan ymestyn y gwasanaethau trên tu hwnt i Abertawe at Gaerfyrddin.  

Hefyd, mae gwasanaeth Pullman Dining Cymreig yn weithredol rhwng Abertawe a Llundain Paddington yn ystod yr wythnos, yn eich galluogi chi i wledda ar fwyd o’r ansawdd gorau a mwynhau rhai o’r golygfeydd gorau ym Mhrydain.